Mat 19 | KYG | STEP | Yesu'a ani gemo hapa paiteno Galeliya kotegati'mo ataleno Yutiya kotega Yoneni ani'mo lakaeno mugagayaga faliga mai'niye.

Matthew 19

A'ne'apimo hapa faitalesage'a visaya kavafe'mo hu'niya gemae

(Mak 10:1-12; Luk 16:18)

1 Yesu'a ani gemo hapa paiteno Galeliya kotegati'mo ataleno Yutiya kotega Yoneni ani'mo lakaeno mugagayaga faliga mai'niye. 2 Asole vaya'mo akame hu'a u'nageno ani haopalega kaita hapau'niya vaya'mo alino hapageno apate'niye. 3 Mago Falasi mono vaya'mogimo agaetegamo e'a amalageka hu'a ge hu'a afisayafe'mo hu'apae'mo, a'nemogimo alu kava alu kava'mo hisage'apae'mo anau'apimogimo afa'a hapa fai'a apatalesayana ke'aepa getimo amagi'a atalesafi kanale kava'mo hugae, hu'a afi ge'nageno'ae'mo, 4 Ve yalavela'ani kavafe'mo Goti mukufi'mo ava gemo hu'niya gemo lekana paitapa o'afi'nafiye. Goti'a avo'mo kae male'niya gemo'mo huno'ae'mo,Goti'a afa yateti'mo alo hu'niya ne'mo'a aepa fai'niya afina'mo ve kano alo huteno a kanomo alo hu'niye. 5 Alo huteno Goti'a huno'ae'mo, ani kava'mo hu'nova'mofe'mo vemogimo a alite'a ita'api afo'apimogimo apatale'a u'a a'api'e'mo ae'a hapaisageno lole kanola'mo magoke anakufamo hamalegaiye. 6 Ani kava hu'ana lole kanola'mo o'mai'ana magoke kanomo maiga'ae. Goti'a ani gemo hu'niya'mofe'mo alino aino kamaeno anate'niya kanolapati'mo mago vaya'mogimo ali'a atana olesaya ya'mo hane'niye, huno hapa pai'nige'apae'mo.

7 Ani gemo hana'monanafa na kava higeno Mosese'a huno'ae'mo, mago vekamo'a a'amo ha faino atalegefe'mo huno'ae'mo ha faino atalesiya avo'mo kaeno amino, huno hu'niye, hu'a afi ge'nae. 8 Hu'a afi ge'nageno'ae'mo, lokiya lapaipamo hane'niya'mofe'mo Mosese'a huno'ae'mo, a'netapimo afa'a hapa faitapa apatalegae, huno hu'niya'monanafa hogoteno ani agufa kava'mo ohane'niye. 9 Nagaemo lapa nepauve, mago vekamo'a a'amo'mo kumai kava'mo osu'nisiya a'amo ha faino ataleteno alu a kanomo ali'nisiyana kumai kava'mo nehiye, hu'na lapa nepauve, huno hapa pai'niye.

10 Ge'amo ne'afiya vaya'mogimo ha pai'apae'mo, ve yalavela'ani kava'mo ani agufa lokiya kava'mo hane'nisiyana a'mo o'alisaya kava'mo mago kanale kava'mo hane'niye, hu'a ha pai'nae.

11 Yesu'a hapa paino'ae'mo, muki vaya'mogimo mani gemo afa'a o'afigae. 12 Apami'nisiya vaya'mogimo afa'a afigae. Alu kava alu kava'mo hane'niya'mofe'mo mago vaya'mo anamo vaya'mo mai'nae. Ita'apimogi ali'a apate'naya afinateti'mo mago vaya'amo anamo vaya'mo mai'nae. Vaya'mogi haginaleti'mo iko nofi'apimo hatagau'a apate'naya afinateti'mo mago vaya'amo anamo vaya'mo mai'nae. Mago'amogimo Goti'a ne'yagaiya kavatefe'mo anamo vaya'mo mai'nae. Afa'a afite'a akame hisaya vaya'mogi afa'a afigae, huno hapa pai'niye.

Yesu'a mafa'ne anaga'ai apakufale'mo aya'mo maleno apate'niya gemae

(Mak 10:13-16; Luk 18:15-17)

13 Mago vaya'mogimo mafa'ne anaga'ai apakufale'mo aya'mo male'neno'ae'mo nunumu huno apatesiyafe'mo Yesutegamo apavaleli'a e'nage'apae'mo ge'amo ne'afiya vaya'mogimo ke hapau'nae. 14 Yesu'a huno'ae'mo, mafa'negana hu'a ne'maiya vaya'mogi Goti'a yagaino ne'apateya kegi'yafi'mo hai'a mai'nageno muki ya'amo apakai'api ya'mo hane'niya'mofe'mo mafa'ne anaga'mo apatafautapa o'apatetapa afa'a apatalege'a nagaetegamo eyo, huno hapa paiteno 15 apakufale'mo aya'mo maleno apateteno u'niye.

Kagemi ya'a'e vekae'mo ava ge hu'niya gemae

(Mak 10:17-31; Luk 18:18-30)

16 Mago vekamo'mo eno Yesufe'mo, Alagepa tisao, huno, alagepa hu'na maige maige hu'na maisuva ya'mo alisuvafe'mo na agufa alagepa kava'mo hisuve, huno afi ge'nigeno'ae'mo, na kava higekae'mo nagaefe'mo alagepa tisao, huka hane. 17 Ma mopafi vaya'mo alagepa vaya'mo o'mai'nafa Gotike'mo magoke'age'mo alagepa ne'mo mai'niye. Kagaemo maige maige hu'na maisuva ya'mo alisu'ekae'mo ke'aepa gemo akame huvo, huno ha pai'niye. 18 Ha pai'nigeno'ae'mo, haiya ke'aepa gee'mo hane, huno afi ge'nigeno'ae'mo,Vaya'mo ohapao. Kumai kava'mo osuvo. Kumaya'mo o'aliyo. Aigofe faigoko gemo osuvo. 19 Itaka afokala'mogani ge'animo afiteka anaiyafi'mo maiyo. Kagaikae'mo kahau kayamopafi'mo kahau'niya kava huka kahaopalega ne'maiya vaya'aife'mo kahaino, huno ha pai'nigeno'ae'mo, 20 neya vekamo mai'nova afinateti'mo ani muki ke'aepa ge'amo akame hume hume e'na hemeni'e'mo akame nehuve. Mago'e na agufa kavafe'mo hai'na metale'nove, huno afi ge'niye. 21 Yesu'a ani gemo afiteno'ae'mo, muki ge'amo akame huteka haika hapaisanafe'mo uka kagemi yakamo alinika uka maketi huge'apao miya fai'a hano hutesageka kagemi ya'apimo ohane'nisiya vaya'mo alika fako huka apamigeno'ao alopa kagemi yakamo koku'napi'mo haneno. Apamiteka eka nakame huvo, huno ha pai'niya'monanafa 22 neya vekamo'a ani gemo afiteno'ae'mo alopa kagemi ya'amo hane'niya vekamo mai'niya'mofe'mo aipamo'mo kana hu'nigeno ataleno u'niye.

23 Ago ataleno utegeno'ae'mo Yesu'a ge'amo ne'afiya vaya'aife'mo, alagi lama ge lapa nepauve, kagemi ya'api'e vaya'mogi Goti'a yagaino ne'apateya kopi'mo haisaya ka'mo lokiya vai'niya ka'mo hane'niye. 24 Mago'e gemo lapa paigesuve, huno huteno, Kamo afumo'mo kukena nefakaniya nekaya kapi'mo faleno haisiyafe'mo aise'amo lokiya vai'niya'monanafa kagemi ya'api'e vaya'mogimo Goti'a yagaino ne'apateya kopi'mo fale'a haisayafe'mo mago'e huno lokiya vai'niye, huno hapa pai'niye. 25 Ge'amo ne'afiya vaya'mogimo ani gemo afite'apae'mo lusi kava hu'a hapau aite'apae'mo, haisaya ka'mo ohane'nisiyana haiya vaya'mogimo afa'a u'a haisageno apakufamo alino katino apateteno hapau vaigiye, hu'a afi ge'nae. 26 Yesu'a aulu hapaeno apaketeno'ae'mo, vaya'mogimo alagi osisaya agufa kava'e'mo Goti'a muki ani agufa kava'mo afa'a hugiye, huno hapa pai'niye.

27 Pita'a, afiyo, huno, lagaemo kakame hisunafe'mo muki yatimo ago ataleta e'none. Lagaemo na agufa ya'mo aligune, huno afi ge'nigeno'ae'mo 28 Yesu'a, alagi lama ge lapa nepauve, huno, mopa'e koku'na'e'mo saufamo afole aisigeno'ae'mo Vemo mafa'nemo'a ha le konali ya'amo aliteno yagaino ne'apateya sia'ale'mo fai mai'nisigetapae'mo nakame nehaya vaya'mogitapamo yagaitapa apatesaya siamo tuolofu'a siate'mo fai mai'netapae'mo tuolofu'a Isaleli nofi vaya'aite'mo yagaitapa apategae. 29 Muki vaya'mogimo nagaetefe'mo no'apimo atale'a e'nisafi konaga'apimogi apatale'a e'nisafi apasa'apimogi apatale'a e'nisafi afo'apimogi apatale'a e'nisafi ita'apimogi apatale'a e'nisafi mafa'ne'apimo apatale'a e'nisafi hoya'apimo atale'a e'nisafi hu'a atale'a e'nisaya vaya'mogimo vani hataleti'a agufa ya'mo alite'a alagepa hu'a maige maige hu'a maigae. 30 Maigaya'monanafa hemenimo mago asole vaya'mo hogote'a ne'maiya vaya'mo henaga vaya'mo maigae. Ani kava hu'a hemenimo mago asole vaya'mo henaga ne'maiya vaya'mo hogote vaya'mo maigae, huno hapa pai'niye.